धनगढीः कैलालीके चुरे गाउँपालिका–१ निगालीम पास्नी भोजम हूइल विवाद ज्यान जैना सम्मके घटना निम्ताइल कैके खुलल बा । करिब एक साताआघ भोजम विवाद होके कुटपिटसे ५२ वर्षीय यज्ञबहादुर बोहराके मृत्यु हूइल रह । सो घटना लुकाइलाग शवहे भीरम लैजाके फाकल प्रारम्भिक अनुसन्धानसे खुलल प्रहरीहूक्र जनाइल बाट ।
इलाका प्रहरी कार्यालय मालाखेतीके अनुसार असोज ५ गते नातेदार धनबहादुर बोहराके नातीके पास्नीम सहभागी हुइ पुगल यज्ञबहादुर ओकर पाछ सम्पर्कविहीन हूइल रहित । खोजी कर्ना क्रमम उहाके शव तुलिखेत जंगलके भीरम फेला परल रल ।
घटनाके अनुसन्धान आघे बढैती प्रहरीहूक्र पास्नीम यज्ञबहादुरसँग मदिरा सेवन करल आठ जहून पक्राउ करल बाट । पक्राउ पर्नाम पास्नी हूइल घरके मूली धनबहादुर बोहरासहित मानबहादुर बोहरा, गोविन्द बोहरा, यज्ञबहादुर बोहरा, दिलीप धामी, रामबहादुर बोहरा, गम्भीर बोहरा ओ तिलक जेठारा बाट ।

मृतकके छावासे देहेल जाहेरीके आधारम पक्राउ परल आठ जहून विरुद्ध कर्तव्य ज्यान मुद्दा दर्ता कैके अनुसन्धान हूइती रहल इलाका प्रहरी कार्यालय मालाखेतीके प्रमुख डीएसपी हिरा सिंह महरा बतैल ।
प्रहरी स्रोतके अनुसार पास्नी भोजम मदिरा सेवन कर्ना क्रमम यज्ञबहादुर ओ मानबहादुरबीच विवाद हूइल रह ।  
औरदिन  यज्ञबहादुरके श्रीमतीहे गराइल विषयहे लेके सुरु हूइल विवाद भोजम पुनः हूइल ओ ओकर पाछ कुटपिट हूइल प्रारम्भिक अनुसन्धानसे  खुलल बा । कुटपिटके क्रमम यज्ञबहादुर भुईँम ढल्के अचेत अवस्थाम पुगल रहित ।
घटनासँग सम्बन्धित एकथो भिडियोसमेत सार्वजनिक हूइल बा । प्रहरीहूक्र भिडियोसहित घटनासँग सम्बन्धित अन्य प्रमाणसमेत अनुसन्धानके दायराम धरल जनाइल बाट । 
अनुसन्धानम संलग्न प्रहरीके अनुसार यज्ञबहादुरके कुटपिटकै क्रमम सोही रात मृत्यु हूइल देखाइल बा । तर घटना सार्वजनिक हुइ ओ आप्नेहे कानुनी फन्दाम पर्ना डरसे शवहे भीरतर्फ लैजाके फाकल प्रारम्भिक अनुसन्धानसे खुलल प्रहरीहूक्र जनाइल बाट ।
प्रारम्भम दुई जनाबीचके विवाद ओ कुटपिटसे घटना सुरु हूइल देखैले से फेन शव भीरम फाकल कार्यम अन्य व्यक्तिके संलग्नता रह कि नैरह , घटना लुकैना योजना कसीके बनल ओ घटनाके वास्तविक कारण का रह कना विषयम प्रहरीहूक्र थप अनुसन्धान कर्ती बाट ।