डोटीके पूर्वीचौकी गाउँपालिका–१० शैंयाँमे रहल आधारभूत अस्पताल सञ्चालनमे आइल करिब एक वर्ष बित्के फेन सेवा प्रभावकारी रूपमे सञ्चालन हुइ नैसेकल कैके स्थानीय गुनासो करल बाटै । स्वास्थ्यजस्ते संवेदनशील क्षेत्रमे अस्पतालके स्वास्थ्यकर्मी समयमै उपलब्ध नैहोके एक सुत्केरी महिला अस्पताल पुग्ना से आघे दग्रिमे बच्चा जन्माइ पर्ना अवस्था आइल स्थानीयके भनाइ बातिन् ।
स्थानीयके अनुसार सुत्केरी व्यथा लाग्लेसे महिलाहे स्टेचरमे बोक्के अस्पताल लैजैती अस्पतालके कर्मचारी ओ जनप्रतिनिधिसँगे करिब एक घण्टासम्मे घरि,घरि फोन सम्पर्क करल रहित । तर, समयमे स्वास्थ्यकर्मी उपलब्ध हुइ नैसेक्के आप्नेहि कर्मचारी खोज्के लाने पर्ना अवस्था सिर्जना हूइल बताइल बाटै । स्वास्थ्यकर्मी अैना ढिला होके सुत्केरी महिलाहे अस्पतालतर्फ लैजैना क्रममे डगरमै बच्चा जन्माइल स्थानीय विष्णु खड्कासहितके युवाके टोलीहूक्रे जनाइल बाटै । युवाहूक्रे तत्काल उद्धार कर्के महिला ओ नवजात शिशुहे अस्पताल पुगाके सुरक्षित रूपमे प्रसूति सेवा उपलब्ध कराइल बताइल बाटै ।
स्वास्थ्य संस्था सञ्चालनमे आइल लम्मा समय बित्के फेन आकस्मिक अवस्थामे स्वास्थ्यकर्मी समयमे उपलब्ध नैहूइल गम्भीर विषय हूइल स्थाानीयके भनाइ बातीन् । अस्पताल व्यवस्थापन, गाउँपालिका ओ सम्बन्धित निकायके घटनाबारे गम्भीर समीक्षा कर्के सेवा प्रवाहमे देखाइल कमजोरी तत्काल सुधार कर्ना माग करल बाटै । विशेष कर्के प्रसूति सेवा जस्ते संवेदनशील अवस्थामे स्वास्थ्यकर्मीके अनुपस्थितिसे महिला ओ नवजात शिशुके ज्यान जोखिममे परे सेक्ना होके अस्पतालहे चौबीसै घण्टा आवश्यक स्वास्थ्यकर्मी ओ आकस्मिक सेवा उपलब्ध हुइना व्यवस्था सुनिश्चित करेपर्ना स्थानीयके माग बाटिन् । घटनाहे दुर्गम क्षेत्रमे निर्माण करल आधारभूत अस्पतालके भौतिक संरचना किल पर्याप्त नैहोके दक्ष जनशक्ति, नियमित सेवा ओ आकस्मिक अवस्थामे तत्काल उपचार पैना व्यवस्था फेन् आवश्यक रहल देखाइल बाट ।
सम्बन्धित निकायहे घटनाके छानबिन कर्के जिम्मेवारी ओ जवाफदेहिता स्पष्ट कर्ना ओ आगामी दिनमे अस्ते घटना फेर से नैहूइ देना आवश्यक कदम चल्ना देखाइत ।
