बाराके जितपुर सिमरा उपमहानगरपालिका(१ के ३ वर्षीया बालिका गरिमा चौधरीउपर हुईल जघन्य अपराधके घटनाहे लेके नेपाल सरकार ओ पीडित परिवारबीच तीनबुँदे सहमति हुईल बा।
गृह मन्त्रालयमे शनिबार रातके हुईल वार्तामे गृह मन्त्री सुधन गुरुङसहित सम्बन्धित मन्त्रालयके मन्त्रीहुक्रे, पीडित बालिका गरिमा चौधरीके अभिभावक तथा सरकारके प्रतिनिधिबीच सहमति हुईल हो।
सहमतिअनुसार जघन्य आपराधिक घटनामे नागरिकके अपेक्षाअनुसार विद्यमान कानुनमे रहल कसुर ओ सजायके व्यवस्था पुनरावलोकन करके कानुन तर्जुमाके लाग सुझावसहितके प्रतिवेदन सात दिनभित्तर पेस कर्ना निर्णय हुईल बा। यकर लाग कानुन, न्याय तथा संसदीय मामिला मन्त्रालयसे सात सदस्यीय ‘गरिमा न्याय संकल्प समिति’ गठन कर्ना हुईल हो।
ओूस्तेके पीडित परिवारके अपेक्षाअनुसार बालिका गरिमा चौधरीके सालिक निर्माण कर्ना पूर्वाधार विकास मन्त्रालय स्थानीय तहसे समेत समन्वय कैके पहल कर्ना सहमति हुईल बा।
पीडित बालिकाके अभिभावक आपन रीतिरिवाज ओ संस्कारअनुसार शवके अन्त्येष्टि कार्य कर्ना विषयमे फेन सहमति हुईदल बा।
सहमति पत्रमे नेपाल सरकारके तरफसे गृह मन्त्री सुधन गुरुङ, पूर्वाधार विकास मन्त्री सुनिल लम्साल, कानुन, न्याय तथा संसदीय मामिला मन्त्री सोविता गौतम, महिला, बालबालिका, लैङ्गिक तथा यौनिक अल्पसंख्यक र सामाजिक सुरक्षा मन्त्री सिता बादी ओ कृषि, वन तथा वातावरण मन्त्री गिता चौधरी हस्ताक्षर करले बाटै।
पीडित परिवारके तररफसे गरिमा चौधरीके बाबा मनोजकुमार चौधरी ओ दाई मानमती चौधरी सहमति पत्रमे हस्ताक्षर करले बाटै। सरकार ओ पीडित परिवारबीच हुइल सहमति घटनामे न्यायिक प्रक्रिया आघे बढईनाके साथै पीडित परिवारके माग सम्बोधन कर्ना प्रतिबद्धता जनागिल बा।
