रसुवास्थित भोटेकोशी नदीमे आइल भीषण बाढीपाछे सुदूरपश्चिमके विभिन्न जिल्लाके ८५ जाने सम्पर्कविहीन हूइल बाटै । 
सुदूरपश्चिम प्रदेश प्रहरी कार्यालयके अनुसार सम्पर्कविहीन हुइना चार जाने सुरक्षाकर्मीसमेत बाटै ।ओम्ने तीन जाने प्रहरी ओ एक जाने सशस्त्र प्रहरी रहल बाटै । 
बाढीपाछे परिवार ओ आफन्तसँगे सम्पर्क हुइ नैसेकलहूके्र  सबसे ज्यादा  कञ्चनपुरके नागरिक रहल बाटै ।  प्रदेश प्रहरी कार्यालयके प्रवक्ता प्रहरी वरिष्ठ उपरीक्षक पदमबहादुर बिष्टके अनुसार कञ्चनपुरके २९, कैलालीके २०, डडेल्धुराके १५ ओ बाजुराके १४ जाने सम्पर्कविहीन हूइल बाटै । ्अस्तेक, बैतडीके चार, डोटीके दुई ओ अछामके एक जाने सम्पर्कविहीन रहल प्रहरीहूक्रे जनैले बाटै ।
प्रभावित क्षेत्रमे उद्धार ओ खोजी कार्य जारी रहल सम्पर्कविहीन रहल संख्या थप बढे सेक्ना प्रहरीहूक्रे जानकारी देहेल बाटै । ‘जिल्ला–जिल्लासे विवरण संकलन हूइती बा ।’ एसएसपी बिष्ट कलै , ‘प्राप्त विवरणअनुसार अबे ८५ जाने सम्पर्कविहीन देखैले बा । 
प्रदेश प्रहरीहूक्रे बाढी प्रभावित क्षेत्रमे रहल सुदूरपश्चिमके नागरिकके अवस्थाबारे थप विवरण संकलन कैना कार्य जारी रहल जनैले बाटै ।